Një 19 vjeçar ka rënë në prangat e policisë së Durrësit për veprën penale “Ndihma për kalim të paligjshëm të kufirit”. Policia ka bërë të ditur se i riu po transportonte drejt Shkodrës, kundrejt pagesës, gjashtë emigrantë nga Irani, që synonin të kalonin kufirin me Malin e Zi në kundërshtim me ligjin.
Mësohet se 19 vjeçari, Olsi Elezi do të merrte 300 euro për secilin emigrant. Në pranga ka rënë edhe 28 vjeçari, Ervin Goduni pasi në aksin rrugor “Durrës-Tiranë” ka përplasur automjetin me të cilin shtetasi 19 vjeçari që po transportonte emigrantët dhe një automjet tjetër.
Për pasojë janë dëmtuar 19 vjeçari që po transportonte emigrantët dhe njëri nga emigrantët, të cilët janë jashtë rrezikut për jetën.
Njoftimi i policisë:
Finalizohet operacioni policor i koduar “Interrupt”, për goditjen e veprimtarisë kriminale të dhënies ndihmë emigrantëve, për kalim të paligjshëm të kufirit.
Transportonte drejt Shkodrës, kundrejt pagesës, 6 emigrantë nga Irani, që synonin të kalonin kufirin me Malin e Zi, në kundërshtim me ligjin, kapet në flagrancë dhe vihet në pranga 19-vjeçari.
Gjatë operacionit u vu në pranga dhe një 28-vjeçar, pasi me automjetin që drejtonte, përplasi automjetin që drejtonte 19-vjeçari dhe një automjet tjetër.
Bazuar në informacionet e siguruara për një rast të transportimit kundrejt pagesës, të emigrantëve që synojnë të kalojnë ilegalisht kufirin, specialistët për Hetimin e Narkotikëve dhe Trafiqeve të Paligjshme, në bashkëpunim me shërbimet e Policisë Rrugore të DVP Durrës, kanë organizuar dhe finalizuar operacionin policor të koduar “Interrupt”.
Gjatë operacionit u arrestua në flagrancë autori i dyshuar i këtij rasti, shtetasi:
O. E., 19 vjeç, banues në Tiranë, për veprën penale “Ndihma për kalim të paligjshëm të kufirit”, pasi nga veprimet hetimore ka rezultuar se po transportonte drejt Shkodrës, kundrejt pagesës 300 euro për secilin, 6 emigrantë nga Irani, të cilin synonin të kalonin ilegalisht kufirin me Malin e Zi.
Gjithashtu, u vu në pranga shtetasi E. G., 28 vjeç, banues në Lushnjë, për veprën penale “Shkelja e rregullave të qarkullimit rrugor”, pasi në aksin rrugor “Durrës-Tiranë”, me automjetin që drejtonte, ka përplasur automjetin me të cilin shtetasi O. E. po transportonte emigrantët dhe një automjet tjetër. Për pasojë janë dëmtuar shtetasi O. E. dhe njëri nga emigrantët, të cilët janë jashtë rrezikut për jetën.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
